LAOAG CITY – Umaboten iti agarop $50-billion ti balor dagiti nadadael iti agtultuloy a mapaspasamak wildfires idiay Los Angeles, California.
Kagiddan daytoy, nagballaag dagiti forecasters iti panagpasar ti napigpigsa pay nga angin a mangitunda ti ad-adda pay a panagwaras ti apoy.
Iti agdama ket umaboten iti agarop 180 ribo a tattao ti naibakwit idinto a ginasut a ribo nga istraktura ti nadadael iti insidente.
Immunan a nakumpirmaran a karaman kadagiti nauram ket ti balay ti sumagmamano nga Hollywood celebrities.
Mainaig iti daytoy, adda met t6i 20 a tattao a tiniliw dagiti otoridad gapu iti panagserrek ken panagtakaw da kadagiti naabandonar a balay kabayatan ti mapaspasamak a wildfires iti lugar.
Kabayatanna, inbatad ni Bombo International News Correspondent Jo Frias iti Los Angeles, California nga alisto a nagramram ken dimmakkel ti apoy iti mapaspasamak a wildfires gapu iti kapigsa ti angin nga inyarig na iti signal number 3 wenno 4 a bagyo ngem awan laeng ti tudo na.
Inpakaammo na a sumagmamano kadagiti naapektaran ti wildfires ket nagtalinaed da kadagiti hotel idinto a dagiti dadduma ket immakar dan iti estado, ken adda met dagiti napan nagnaed kadagiti bukod da a resorts.
Innayon na a ti pakapaspasamakan ti wildfires ket lugar dagiti mabigbig a tattao, karaman dagiti Hollywood celebrities isut gapuna a kabaelan da ti agtalinaed kadagiti nagduduma nga hotel kalpasan ti pannakapukaw da iti bukod da a pagtaengan.
Iti sabali a bangir, kuna ni Frias nga awan pay ti nadamdamag na no adda dagiti pada na a Pilipino a naapektaran iti mapaspasamak a wildfires idiay Los Angeles, California.
Kuna na pay nga iti agdama ket nakatutuk laengen dagiti firefighters kadagiti babassit nga uram kangrunaan na dagiti borders tapno saanen a makaballasiw ti apoy iti sabali a lugar.
