LAOAG CITY – Agpapan ita ket saan pay a masigurado dagiti eksperto no ania ti agbalbalin a makaigapu iti autismo wenno autism spectrum disorder (ASD), maysa a neurological ken developmental disorder a makaapektar iti pannakilangen, pannakisarita ken makasursuro ti maysa a tao.
Segun ken ni Dr. Francis Dimalanta, ti Developmental pediatrician ti St. Luke’s Medical Center, adda dagiti mangibaga a genetics, mabalin pay nga iti aglawlaw, ipapauneg a taraon ken dadduma pay.
Inbatad ni Dimalanta a makaalarman ti umad-ado a kaso ti autism iti pagilian a mapatta-patta nga umaboten iti 1.5 million iti agdama.
Inpalgak ti doktor a ti kapatgan ket maestablisar a dagus no ti maysa nga ubing ket addaan ti sintomas ti autism.
Innayon na a mabalin a maobserbaran ti autismo babaen ti naladaw a panagsarita ti ubing, marigatan a makilangen kadagiti tattao, ken maulit-ulit dagiti ar-aramiden na kas iti hand flapping, spinning, wenno swirling.
Inpetteng ti doktor a normal nga agbalin nga in-denial dagiti nagannak ngem masapol nga awaten da tapno al-alisto da a masolusyonan ti sagsagabaen a sakit ti anak.
