LAOAG CITY – Umaboten iti 25 milyon a Pilipino ti nakipaset iti maysa nga online signature campaign a gagem nga ipadalan ni Vice President Sara Duterte iti impeachment trial iti Senado.
Segun ken ni Polytechnic University of the Philippines (PUP) Prof. Louie Montemar, agtultuloy a manaynayon ti bilang dagiti makipaspaset iti nasao a kampania.
Iti uneg laeng ti dua agingga tallo nga oras kalpasan a nairubuat ti online signature, insigida nga immabot ti agarup 3 milyon a pirma ti naukkon.
Ti nasao a kampania ket kagiddan ti anunsio ti Senado nga agsagsaganadan iti panangtalantan ti Articles of Impeachment nga inpasa ti Kamara de Representantes no sadinno a 257 ti nagbutos, 25 ti kimmontra ken 9 nga abstain.
Ni Vice President Sara ket sumangsango kadagiti alegasion ti irregularidad iti pananggastos ti P612.5 milyon a confidential funds, saan a maipalawag a baknang, panagpasuksok ken maipagarup a death threats kontra ken ni Presidente Ferdinand Marcos Jr., First Lady Liza Araneta Marcos, dati nga House Speaker Martin Romualdez ken dadduma pay nga opisial.
