LAOAG CITY – Inpakaammo ni Mrs. Lizette Atuan, ti mangidadaulo ti Provincial Public Employment Service Office a maiyuswat ti umuna a face to face job fair ditoy Ilocos Norte ita a tawen 2022.
Segun kenkuana, naituding daytoy inton Pebrero 9 iti maysa a dakkel a mall iti ili ti San Nicolas kangrunaanna iti expansion kas paset pay laeng iti pannakaselebrar ti maika-204 a founding anniversary ditoy Ilocos Norte.
Inbatadna nga adda ti 50 nga employers manipod kadagiti nagduduma a pangopisinaan, establishmento, pasdek negosio ken dadduma pay ditoy probinsia ti naimbitaran a makipagpaset iti nasao nga aktibidad.
Kunana a gundawayan dagiti kakailian iti daytoy maiyuswat a programa nangruna ket naruay a panggedan ti mabalin nga aplikaran dagiti agbirbirok ti pagtrabahoan wenno baro a pagsapulan ken pamastrekan iti biag.
Inpakaammona nga adda ti 500 agingga 1,000 a trabaho ti agur-uray kadagiti aplikante rason a saanen a palabsen ti gundaway a maaddaanen ti trabaho gapu ta narigat ti awan ti pagsapulanna iti baet ti pandemia.
Mainaig iti daytoy, inlawlawagna nga awan met pay ti maidiaya a trabaho para kadagiti kaprobinsiaan iti ballasiw-taaw gapu iti pangta ti COVID-19.
Innayonna a saan a liplipatan nga itugot dagiti kangrunaan a kasapulan a requirements iti panagaplikar iti trabaho nangnangruna iti panagparehistro nga umuna iti workin.ilocosnorte.gov.ph gapu ta masaludsodto daytoy kadagiti maseknan nga aplikante apaman a mainterbyu.
