LAOAG CITY – Manamnama a mairaman iti power grid inton 2035 ti umuna a kuryente a maaramid manipud iti nuclear power iti pagilian, tallo a tawen a naiyalud-od iti umuna a target ti gobierno a 2032 kabayatan ti panaguray ti panagdur-as dagiti regulatory ken safety requirement basar ken ni Department of Energy (DOE) Energy Utilization and Management Bureau Director Patrick Aquino.
Mangisaysayangkat ti Department of Energy (DOE) dagiti pagannurotan para iti kangrunaan nga auction ti nuclear power generation capacity iti pagilian.
Sakup ti draft rules dagiti requirement para kadagiti makipaset, capacity allocation, presio, kontrata, panagpili ti lugar, safety standards ken suporta ti gobierno.
Iti babaen ti naisingasing a pagannurotan, mabalin a makaala ti gobierno ti agingga 10 percent stake iti umuna a nuclear project babaen iti Philippine National Oil Co., Maharlika Investment Corp. wenno dadduma pay nga ahensia ti gobierno a maipadalan daytoy iti negosasion, due diligence, dagiti kasapulan a panangaprobar ken fiscal regulations.
Pinirmaan ni Presidente Ferdinand Marcos Jr. idi Setiembre 2025 ti Republic Act No. 12305 a naaramid iti Philippine Atomic Energy Regulatory Authority (PhilAtom).
Ti independent quasi-judicial body ket maaddaan ti “sole and exclusive jurisdiction to exercise regulatory control” iti nakappia, natalged ken secure ti panagusar ti nuclear energy ken radiation sources iti pagilian.
Innayon ni Aquino nga agtultuloy nga isagsagana ti gobierno dagiti kasapulan para iti pannakaipatungpal ti regulatory body nupay awan pay ti implementing rules and regulations ti linteg.
