LAOAG CITY – Maiyuswat ti umuna a panagdengngeg iti kaso administratibo ni Barangay Chairman Rodolfo Ramirez iti Barangay Salet-Bulangon ditoy ciudad ti Laoag intono Oktubre 22 iti oras ti alauna y medya ti malem.
Daytoy ti inbatad ni Vice Mayor Vicentito Lazo ditoy ciudad.
Inbaga ti bise mayor nga innem a konsehal ken maikapito isuna a pimmabor nga adda ti probable cause iti kaso a naipila kontra iti nasao a kapitan idinto nga innem dagiti kameng ti konseho a kimmontra.
Immunan nga inbatad ti kapitan a ti patien na a nangrugyna ti kaso na ket ti saanna a panangited ti sertipikasyon ti daga a kayat nga aladan ti maysa a kabarangayan na.
Maipalagip nga inlawlawag idi ti kapitan a mapagriririan ti nasao a lote isut gapuna a saanna nga inikkan ti sertipikasyon ti kabarangayan na.
