LAOAG CITY – Kinumpirmaran ti National Disaster Management Agency iti Indonesia a dua ti natay ti magnitude 7.7 a gingined, pakairamanan ti maysa a lalaki ken maysa a babai.
Manarimaan pay laeng ti panagberipikar ti datos ti biktima basar iti ahensia.
Maipalagip a naggined iti Flores region ti East Nusa Tenggara sakbay ti alas-5 ti bigat nga adda ti kauneg a 15 a kilometro basar iti Indonesian agency for Meteorology, Climatology ken Geophysics.
Inisyal a nangiyisyu ti otoridad ti potensial a tsunami warning kalpasan ti gingined ngem indeklararda a nalpasen.
Mainaig iti daytoy, nangiyisyu met ti ahensia a prioridadda ti public safety ken maprebentaran ti nayon a problema manipud ti aftershocks ken related hazards.
Narikna ti napigsa nga aftershocks iti lugar pakairamanan ti maysa nga umabot ti magnitude 6.1.
Binalakadanda ti publiko nga agtalinaed a naridam ken umadayo iti kabaybayan.
