LAOAG CITY – Awan ti foul play iti pannakatay ti maysa a lakay ken nadiskobre iti kanal iti Brgy. Pipias iti ili ti Bacarra.
Kuna ni PMaj. Arnel Tabaog a daytoy ti rimuar iti immunan a resulta ti panagimbestigar dagiti kameng ti scene of the Crime operatives (SOCO) ken rural health unit iti nasao nga ili.
Nu pay kasta, inpakaammo na a manamnama a maipadalan iti otopsiya ti bangkay ti biktima a ni Mr. Agustin Subia tapno maamoan ti pudno a nakatayan daytoy.
Immuna iti daytoy, inlawlawag ni Tabaog nga awan ti foul play gapu ta ti sugat a nakita iti ulo ti biktima ket posible a naala na manipod ti riprap idi natenneg iti kali.
Inbatad ni Tabaog nga agtultuloy ti imbestigasyon iti insidente babaen iti tulong ti SOCO.
Nagpanawagan ni Tabaog iti publiko a masapol nga urayen ti iparuk-at a resulta ti imbestigasyon dagiti otoridad sakbay a maaddaan ti naruay nga spekulasyon.
Kabayatanna, mangnamnama ti hepe a maaamoan iti kabiitan a panawen ti pudno a nakatayan ti biktima.
Maipalagip nga immunan nga inbutaktak ni Barangay Kagawad Chito Visaya iti Barangay Pipias nga adda ti nakakita a nakabkabil ti biktima iti rabii sakbay a naduktalan a maysan a nalamiis a bangkay.
Segun kenni Visaya, inbaga kenkuana a mismo ti agnagan ti James Valiente a bayat ti panagawid na ket adda ti dua nga indibidual a mangkabkabil iti biktima.
Inlawlawag na nga intudo a mismo ti witness ti agnagan ti “JR” ken ti kadua na a dagitoy ti nangkabkabil kenni Subia ken maipagarop a pinang-or da daytoy ti kayo.
Inbatad pay ni Visayas a ti biktima ket adda ti sugat iti teltel na a nakita da idi naiyaon daytoy manipud iti kanal.
