LAOAG CITY – Mapatta-patta nga umabot iti nasurok a 500 a ribo a pisos ti balor dagiti nadadael iti pannakauram ti maysa a balay iti Barangay Nagpatayan iti ili ti Banna.
Daytoy ti inrakurak ni Senior Fire Officer IV Reynante Bismonte, ti firemarshall iti Bureau of Fire Protection iti ili ti Banna.
Segun ken ni Bismonte, naminpinsan a nauram ti balay a kukua ni Editha Pambid, agtawen ti 70.
Inpakaammo ni Bismonte a nairaman pay a dimmapo ti iduldulin ni Pambid a 29 a ribo a pisos ken dagiti sinako nga irik.
Mainaig iti daytoy, kuna ti opisyal nga agtultuloy paylaeng ti imbestigasyon da tapno maamoan no ania ti pudno a nangrugyan ti uram.
Innayon na a saan da pay a nakasarita a naimbag ni Pambid gapu ta agpapan maisursurat daytoy a damag ket saanna paylaeng a maawat ti pannakapukaw na iti balayna.
