LAOAG CITY – Nabigbigen ti driver ti delivery close van a nakadungpar ti tricycle driver iti paset ti Brgy. 32, Cororcor iti ili ti Bacarra.
Maipalagip a pimmusay ti tricycle driver a ni Edvin de Leon, agtawen ti 27, taga Brgy. 31 Calioet-Libong iti nadakamat nga ili gapu kadagiti sinagaba na a nakana a sugat.
Segun ken ni Police Major Sheryl Guzman, ti acting Chief of police iti ili ti Bacarra, nabigbig da ti delivery close van ken ti driver na babaen ti maysa a testigo a taga Barangay Bani iti ili ti Bacarra.
Inbatad ni Guzman a ti suspek ket agtawen ti 37, residente iti ili ti Marcos ngem 10 a tawenen nga agtrabtrabaho iti maysa a kompanya iti Barangay 50, Buttong ditoy ciudad ti Laoag.
Kuna ni Guzman a nakasarita dan ti suspek ken inbatad na a saanna a nadlaw nga adda ti nasapgud na a tricycle kagiddan ti panangibaga na a nakasagana a mangsango ti aniaman a maipila a reklamo kontra kenkuana.
Inpakaammo ni Guzman a pilaan da ti kaso a reckless imprudence resulting in homicide ti nasao a suspek.
