LAOAG CITY – Nagtalinaed a comatose ti driver ti motorsiklo a naidungpar iti pick-up iti Brgy. 13 ditoy siudad ti Laoag idi Enero 13 ita a tawen.
Nabigbig driver ti motorsiklo a ni Jose Bejia Jr. agtawen ti 42 ken residente ti Brgy. 29 Pasiocan iti ili ti Bacarra idinto a ti nangiturong ti pick-up a Ford Ranger ket ni Rafael Danao, agtawen ti 47, residente ti Brgy. 13 ditoy siudad ti Laoag.
Maipalagip a basar iti imbestigasyon ti Philippine National Police ditoy ciudad ti Laoag, agpada nga agpapa-amianan dagiti dua a behikula, ngem idi makadanun ti pick-up iti batog ti balay da ket nagsignal para iti panagparking na ngem isu metten ti pannakadungpar ti motorsiklo.
Gapu iti daytoy, nagsagaba ti sugat iti nagduduma a paset ti bagi ni Bejia ken naitaray a dagus iti Governor Roque Ablan Senior Memorial Hospital ditoy ciudad para iti pannakataming na, ngem agpapan ita ket nagtalinaed daytoy a comatose.
Naamoan nga addan ti inisyal a panagsarita ti driver ti pick-up ken ti pamilya ti biktima ngem saan da a nakapagtulag a nasayaat.
Daytoy ket kalpasan a nagkedked ti driver ti pick-up a mangibaklay amin kadagiti magastos ti biktima iti ospital nga isu ti kalikagom ti pamilya.
Inpetteng ti driver ti pick-up a saanna a basol ti napasamak isut gapuna a saan nga immanamong iti kayat ti pamilya Bejia.
Nupay kasta, iti panangtingiting ti Philippine National Police iti napasamak a disgrasya ket agpada nga adda ti nagkurangan dagiti dua a driver.
