LAOAG CITY – Patien ni Police Major Arnel Tabaog, ti chief of police ti PNP-Vintar nga adda ti kakunsabo wenno contact iti ili da dagiti indibidual a naggandar a mangiruar ti 13 baboy ditoy probinsya.
Segun kenni Tabaog, basar iti pass slip dagiti maseknan, naggapo ta iti Metro Manila ken napan da iti Region 2 ken kalpasan ket agturong da iti Abra.
Inlawlawag na a sigurado nga adda ti am-ammo dagiti indibidual iti ili ti Vintar rason a dimmagas da ken nagatang da ti 13 a baboy.
Ummuna iti daytoy, kunana nga adda ti naawat da a report nga adda ti agikilkilo ti baboy iti slaughter house ken idi napan dagiti pulis ket pimmanaw dagitoy rason a kinamat da agingga a natiliw dagiti maseknan ditoy ciudad babaen iti panangtulong ti PNP-Laoag ken Provincial Veterinary Office (PVO).
Ditoy a naamoan a basar iti pass slip ket masapol a lumabas laeng ti truck ditoy Ilocos Norte agingga iti oras ti 6:35 ti malem ngem natiliw dagitoy iti pasado alas-siete iti rabii.
Kunana a naiturn-over dagiti innem nga indibidual iti PNP-Pagudpud nga isu ti mangipila ti reklamo mainaig iti panagsalungasing da iti pagadalan ti IATF ken isuda ti mangipila ti kaso maipanggep met iti provincial ordinance iti panagibyahe ti baboy.
