LAOAG CITY – Naipilan ti kaso a murder kontra ken ni Alexis Arone Sta. Maria, adda iti umno tawen, Grade 11 student ti Ilocos Norte College of Arts and Trades ken residente iti Brgy. 1 ditoy Siudad gapu iti inaramid na a pammagkong a puon ti nakatayan ti maysa a baro a ni Mark Vincent Toledo a residente ti Brgy. 46, Nalbo ditoy siudad kageddan ti pannakaiyakar na iti Bureau of Jail Management Penology ditoy siudad.
Daytoy ti inpakaammo ni Pol. Chief MSgt. Erwin Geralde, ti ront desk officer iti Philippine National Police Laoag.
Kuna ni Geralde a gapu iti kaso ti suspek ket maibalod ti 18 a tawen.
Kabayatanna, agpapan ita ket saan pay a nadeterminar dagiti kakadua ti suspek idi napasamak ti pammagkong.
Maipalagip a natay ni Toledo kalpasan a binagkong ni Sta. Maria idi parbangon ti Hunyo 2.
Basar iti insayangkat nga imbestigasyon dagiti otoridad, agarup alas dos y media iti parbagon iti nasao nga aldaw ken bayat a nakalugan ti biktima kaduana dagiti barkadana iti motorsiklo nga Honda Click a nagturong iti sango ti maysa a tiangge tapno gumatang ti sigarilyo ngem saanda a nakagatang gapu ta nakarikep daytoy..
Naamoan nga adda ti dua a lallaki a nakatugaw iti asideg ti tiangge nga immasideg iti grupo ti biktima ken ado ti insawang da a saan naalas a sarita agingga a nagriri dagiti dua a grupo.
Kalpasan ti sumagmamano laeng a segundo ket nagtataray dagiti dua a kadua ti biktima idinto a saan nakataray ti biktima agingga a natulid daytoy iti kalsada.
Apaman nga adda ti limmabas a nakamotorsiklo nga isu ti nakakita iti biktima a nakadasay iti kalsada ket dagus a dimmawat ti tulong tapno itaray iti ospital gapu iti nakita a bagkong.
Mainaig iti daytoy, basar ken ni Dr. Albano iti Governor Roque B. Ablan Sr. Memorial Hospital, nagsagaba ti biktima ti bagkong iti nagduduma a paset ti bagina babaen iti saan a masinunuo a natadem a banag ken isu ti puon ti nakatayan na.
