LAOAG CITY – Nakita nga adda ti dua a tama ti bala ti paltog iti bara ti lalaki nga agan-anup nga immunan a nagpukaw kalpasan a natnag iti derraas iti Mount Bumandera iti Barangay Sto. Niño iti ili ti Nueva Era.
Segun ken ni P/Capt. William Sotelo, Hepe ti Nueva Era Municipal Police Station, nabigbig ti biktima a ni Gringo Barid, agtawen ti 33, naasawaan ken residente ti Barangay Cacafean iti ili ti Marcos idinto a nabigbig dagiti dua a kadua ti biktima nga isuda Albino Magno ken Hilbert Tuqyao.
Inbatadna a nagturong dagiti tallo iti nasao a kabanbantayan tapno mapan aganup ti wild animals kas ti baboy ramo ken ugsa.
Inlawlawagna a basar ken ni Albino, maysa kadagiti kadua ti biktima a kabayatan ti panaganupda ket kellaat a natnag ti biktima iti derraas.
Malaksid iti daytoy, kuna ni Albino a kabayatan ti panangtiliwda iti maysa nga ugsa ket natulid ni Gringo ken ti iggemna a paltog ket maipagarup nga aksidente a nakalbitna rason a pimmutok a nakatamaan iti paset ti bara ti biktima nga isu metten ti pannakatnagna iti derraas.
Nupay kasta, inpakaammo ni P/Capt. Sotelo, saan a mamati ti pamilia ti biktima iti napasamak isu a nagdesision dagitoy a maipadalan ti bangkay ti biktima iti autopsy tapno maammoan no adda ti foul play a napasamak wenno awan.
Innayonna a narekobre iti nakapasamakan ti insidente ti improvised 12-gauge shotgun.
Kabayatanna, naammoan a mapatta-patta nga adda ti innem agingga iti walo a kadapan ti kauneg ti derraas a nakatnagan ti biktima.
Maipalagip nga agarup maysa nga aldaw a binirbirok dagiti residente ti nasao a biktima kalpasan a naipadamag kadakuada a natnag daytoy iti derraas.
