LAOAG CITY – Nabirukan iti Padsan River iti paset ti Barangay Rioeng ditoy ciudad ti Laoag ti bangkay ni Mr. Alejandro Gaba, agtawen ti 62, naasawaan ken residente ti Barangay 2, Hilario iti ili ti Banna kalpasan ti tallo nga aldaw a panangiyuswat dagiti otoridad ti search ken rescue operation.
Daytoy ti kinumpirmaran ni Fire Supt. Roxanne Parado iti Bureau of Fire Protection ditoy probinsya.
Ti search and rescue operation ket nagbibinnuligan nga inwayat dagiti kameng ti Municipal Disaster Risk Reduction and Management Office iti ili ti Banna, Banna Municipal Police Station, Philippine National Police – Special Action Force, 2nd Provincial Mobile Force Company, Philippine Marines ken Bureau of Fire Protection.
Maipalagip nga agarup 4:30 ti malem idi Agosto 6, ti biktima ken ti anakna ket napanda inyakar ti tarakenda a baka gapu iti napigsa a tudo.
Nupay kasta, agarup 6:00 ti rabii iti kapada a petsa ket saan pay a nakaawid ti nasao a senior citizen rason a biniruk daytoy ti pamiliana ngem napaay dagitoy isut gapuna a nagpatulong dan kadagiti otoridad.
Kabayatanna, inbatad ni P/Maj. Exiquiel Giovanni Doloroso, ti chief of police iti ili ti Banna a possible a naiyanud ti biktima gapu iti kinaapres ti danom iti karayan agingga a nalmes.
Innayon na a saanna pay a masigurado no kalikagoman ti pamilya ti biktima a maipadalan ti otopsya ti bangkay na.
Mainaig iti daytoy, nagpalagip ni Doloroso kadagiti umili a liklikan ti agturong iti karayan no agtudtudo gapu ta alisto laeng a dumakkel ti danom a mabalin a pakairisgoan a kas ti napasamak iti nasao a senior citizen.
