LAOAG CITY – Naipilan ti kaso a panaglabsing iti Animal Welfare Act babaen iti inquest kontra kadagiti dua nga indibidual a residente iti Barangay 3 iti ili ti San Nicolas gapo iti panagparti da iti aso.
Daytoy ti inpakaammo ni Police Major Eduardo Santos, ti chief of police ti Philippine National Police iti ili ti San Nicolas.
Inbatad ni Santos a nairekomendar ti sag-innem a ribo a pisos a piyansa dagiti suspek para iti temporaryo a pannakawaya-waya da.
Nupay kasta, saan da a nakapagbayad ti piyansa da sakbay a nagrikep ti opisina a pagbayadan da rason a nagtalinaed da paylaeng iti kustodyar ti Philippine National Police iti nasao nga ili.
Immunan nga inlawlawag ni Santos nga adda ti dimmanon a report kadakuada seknan iti panagparparti ti aso dagiti dua nga indibidual ken iti panagresponde da ket napaneknekan da a pudno ti naidanun nga impormasyon kadakuada.
Inlawlawag na a nagparti dagiti maseknan ti aso gapo ta isu ti maipagarop a sidaen ken pulutanen da.
Mainaig iti daytoy, inadmitir dagiti suspek a saanen a daytoy ti damo a panagparti da ti aso.
