LAOAG CITY – Naragsak nga inpakaammo ni Mr. Lawrence Valmonte, Overseas Filipino Worker Adviser idiay Saudi Arabia nga agawiden ditoy Pilipinas ni Ms. Catherine Tagaca Andres a residente iti Brgy. 21 iti ili ti Sarrat ken Overseas Filipino Worker idiay Saudi Arabia inton bigat, Agosto 15.
Segun kenkuana, inabisoanna ti maseknan nga Overseas Filipino Worker nga apaman a makasangpet isuna iti Ninoy Aquino International Airport ket umasideg daytoy iti Overseas Workers Welfare Administration Assistance Desk tapno maitulod isuna iti terminal bus ken maipaayan ti pagplete nga agawid ditoy probinsia.
Inpasingkedna a makaawat ti nasao nga Overseas Filipino Worker ti 20 ribu a pisos manipud iti Overseas Workers Welfare Administration para iti Balik Pinas, Balik Hanapbuhay Livelihood Assistance.
Maipalagip a namaltrato ti maseknan nga Overseas Filipino Worker gapu iti panangdangran ti amona a lalaki.
