LAOAG CITY – Saanen nga interesado ti pamilya Abrigado nga ituloy ti imbestigasyon iti pannakatay ni Barangay Chairwoman Helen Abrigado, seknan pay laeng iti pannakapalto-paltog a poon ti nakatayan na iti Barangay Ferdinand iti ili ti Marcos.
Iti baet daytoy, inpasingked ni Mayor Antonio Mariano iti nadakamat nga ili nga itultuloy ti nailian a pulisya ti agimbestigar mainaig iti nasao a kaso, nu pay saanen nga interesado ti nadakamat a pamilya.
Inpakaammo na pay a nagtalinaed ti inparuk-at na a gunguna a 300 a ribo a pisos para iti siasinno man a makaipaay ti impormasyon no siasinno ti adda iti likudan ti pannakapapatay ni Barangay Chairwoman Abrigado.
Innayon na a kas ama ti ili ket awan ti sabali a kalkalikagoman na no saan a ti pannakasolbar ti kaso iti kabiitan a panawen.
Maipalagip a kalpasan ti panagatendar ti lantern parade ket agawid koman ti grupo ti biktima a nakalugan iti Mitsubishi L300 FB a kukua ti Barangay Ferdinand ken inturong ni Brgy. Kagawad Carlo Bagaoisan, ngem idi adda da iti karayan iti paset ti Brgy. Tabucbuc ken ditoyen a napaltu-paltugan ni Abrigado babaen kadagiti dua a lallaki a naglubbon iti motorsiklo.
Naitaray ti biktima iti Doña Josefa District Hospital babaen kenni Kag. Bagaoisan ngem naiyakar daytoy iti Mariano Marcos Memorial Hospital and Medical Center iti ciudad ti Batac nga isu metten ti nakatayan na gapu kadagiti sinagaba na a nakana a sugat.
