LAOAG CITY – Manamnama a maipila ita nga aldaw ti kaso a frustrated homicide kontra iti construction worker a suspek iti napasamak a panagtagtagbat iti ili ti Vintar.
Daytoy ti inbatad ni Police Capt. Jofel Pascual, ti chief of police iti ili ti Vintar.
Ti biktima ket addaan ti umno a tawen, naasawaan ken residente ti Barangay 12, Namoroc iti ili ti Vintar idinto a ti suspek ket agtawen ti 52, addaan ti live-in partner ken residente ti Barangay 11 Bulbulala iti metlaeng nasao nga ili.
Immunan a naduktalan iti imbestigasyon ti Philippine National Police nga adda ti immuna a nakariri ti biktima iti maysa a minatayan isut gapuna a naganawa ti suspek.
Nupay kasta, rumrumuar a kinagura ti biktima ti panaganawa ti suspek agingga nga isudan ti nagriri.
Ginandat pay ti biktima a dangran ti maysa a nakaimatang iti pasamak isut gapuna a nagawid ti suspek ken idi agsubli ket addan ti iggem na a samurai nga isu ti inusar na a panangtagtabat iti biktima a nakasugatan ti tengnged, takiag ken napingawan ti lapayag na.
Iti agdama, nagtalinaed ti biktima iti Mariano Marcos Memorial Hospital and Medical Center iti ciudad ti Batac para iti naan-anay a pannakaagas na.
Ti nausar a samurai knife nga agatiddog ti 80 a sentimetro ket narekober iti asideg ti nakapasamakan ti insidente.
Naamoan nga agpada a nakainom ti arak ti biktima ken suspek idi napasamak ti insidente.
Kabayatanna, boluntario a simmuko ti suspek kadagiti otoridad kalpasan ti insidente.
