LAOAG CITY – Inpakaamo ni Police Major Hermy Ancheta, ti chief of police iti Philippine National Police iti ili ti Sarrat nga addan iti dua a person of interest a mabalin nga adda iti likodan iti napasamak a pammaltog iti Brgy. 19 Sto. Tomas ken nangitunda iti pannakatay ni Magno Balicoco y Pascual, agtawen ti 55 ken residente iti nasao a barangay.
Inbatad ni Ancheta a maysa kadagti person of interest ket ti nakariri ti biktima mainaig kadagiti nakalap nga ikan, addan sumagmamano a tawen ti napalabas nu sadinno a naibaga na pay iti asawa na nga arig a dakes ti panagkitkita daytoy kenkuana.
Mainaig iti daytoy, kuna na a ti maysa nga ad-adalen da nga adda iti likudan ti nasao nga insidente ket suspek iti napasamak a rape iti kaanakan na.
Kabayatanna, inbunannag ni Ancheta nga iti agdama ket maiyus-uswat pay laeng ti naun-uneg nga imbestigasyon iti napasamak.
Innayun na nga adda met ti maiyur-uray a kopya ti cctv footage a nakaimuntar iti Brgy. 19 ken daytoy ti mabalin a makatulong iti panangduktal ti pakabigbgan dagiti pucno a suspek.
Maipalagip a natay ni Balicoco kalpasan a napaltugan iti asideg ti Padsan River ken naggapo a nagsilaw ti lames iti karayan.
Nagsagaba ti biktima ti tama ti bala ti paltog iti ulo ken bukot na nu sadino nga apama a naitaray iti Dingras District Hospital ket naideklara a dead on arrival.
Narekobre met iti nakapasamakan ti pammaltog ti dua a kapsula ti bala ti mapapati a kalibre 45 a paltog.
