LAOAG CITY – Natiliwen ti maysa kadagiti maitudtudo a suspek iti napasamak a pammaltog a puon ti nakasugatan ti biktima a ni Rodolfo Tacmo Jr., residente iti Sitio Paratong, Barangay Saud, Badoc.
Daytoy ti inpakammo ni PMaj. Joseph Tayaban, ti hepe ti PNP Badoc.
Segun kenkuana, natiliw ti suspek babaen iti inyuswat nga hot pursuit operation dagiti kameng ti Provincial Intelligence Unit nga indauloan ni PLt. Col. Jonathan Papay.
Binigbig ni Tayaban ti suspek a ni Melvin Dagupion, residente iti Brgy. Pagsanahan Norte iti nasao nga ili.
Nu pay kasta, kuna na a naiget a naglikudan ti suspek ti akusasyon kontra kenkuana ken saan met pay a nakumpiskar ti paltog a nausar iti pammaltog.
Kabayatanna, inbaga ni Tayaban a ti posible a motibo ti pammaltog ket ti maipagarup a panagbalin a witness ti suspek iti kaso nga arson dagiti suspek.
Nagpanawagan met daytoy iti maysa pay a suspek a dumatag kadagiti otoridad tapno masungbatan na ti akusasyon kontra kenkuana.
Innayun na a manamnama a sumango iti kaso a frustrated murder dagiti suspek.
Maipalagip a nasugatan ti luppo ti biktima kalpasan a napaltugan kabayatan ti panpan na kuma pannangan iti pamilya na iti cottage nga adda iti igid ti baybay iti Brgy. Pagsanahan Sur iti ili ti Badoc.
