LAOAG CITY – Nagballigi dagiti otoridad a nangtiliw ti maysa a lalaki iti naiyuswat nga anti-illegal drug buy-bust operation iti Barangay 22, Bani iti ili ti Bacarra.
Segun ken ni Police Capt. Joseph Calderon, ti chief of police iti ili ti Bacarra, ti suspek ket agtawen ti 36, awanan ti asawa, vegetable vendor ken residente iti Barangay 24, Macupit iti nasao nga ili.
Inbatad ni Calderon a kinemmeg a dagus dagiti otoridad ti suspek kalpasan a naglako ti maysa a sachet a naglaon ti maipagarop a shabu.
Innayon na nga iti panangkapkap da iti suspek ket nakakumpiskar da pay ti uppat a sachet a naglaon metlaeng ti maipagarop a shabu, 6 a ribo a pisos a buy-bust money ken ti motorsiklo nga inusar ti subject ti operasyon.
Mainaig iti daytoy, kuna ni Calderon a ti nasao a suspek ket maibilang kas Street Level Individual iti Drug Watchlist ti Philippine National Police iti ili ti Bacarra.
Kuna na pay a nagpaot ti tallo a bolan a minonitor da ti suspek sakbay nga inwayatan da ti operasyon.
Iti agdama, nagtalinaed ti suspek iti Philippine National Police iti ili ti Bacarra bayat a maisagsagana ti maipila a kaso a panaglabsing ti Republic Act 9165 wenno Comprehensive Dangerous Drugs Act of 2002 kontra kenkuana.
