LAOAG CITY – Naikeddeng a sumango iti Manhattan federal court inton bigat, aldaw ti Lunes ti Presidente ti Venezuela a ni Nicolás Maduro.
Daytoy ti kinumpirmaran ti maysa nga opisial ti United States Department of Justice.
Ni Maduro ket sumangsango kadagiti nagduduma a kaso idiay Estados Unidos pakairamanan ti panagkunsabo nga adda ti pakainaiganna iti narco-terrorism.
Sumangsango pay kadagiti kaso ti asawana pakairamanan ti panagkunsabo nga adda ti pakainaiganna iti panangiserrek ti cocaine idiay Estados Unidos.
Sakbay ti umuna a panagsangona iti Korte, manamnama nga agtalinaed ni Maduro iti Metropolitan Detention Center iti Brooklyn.
Nag-landing ti eroplano no sadinno a nakalugan ni Maduro ken ti asawana iti Stewart International Airport, sumurok-kumurang 97 a kilometro iti amianan a laud ti New York City.
Kalpasan a nag-landing ti eroplano, sumangmamano a tauhan ti Estados Unidos a nakasuot nga addaan ti marka ti FBI ken dadduma pay nga ahensia ti ngimmato iti eroplano.
Kabayatanna, nagtalinaed a saan a nalawag no kasano nga idauluan ni United States President Donald Trump ti Venezuela.
Iti agdama, awan ti direkta a kontrol ti puersa ti Estados Unidos iti nasao a pagilian ken agtultuloy latta ti panangidaulo ti gobierno ni Maduro nga arig awan ti plano a makitunnulong iti Washington.
Awan pay ti opisial a rakurak ti gobierno ti Venezuela mainaig iti pannakaarestar ti Presidenteda a ni Nicolas Maduro.
