LAOAG CITY – Inbatad ni Vice Mayor Jonathan De Lara iti ili ti Solsona a datin nga adda ti baybayadan dagiti sumrek nga ag-reaper iti ili da.
Segun kenni De Lara, 10 a ribo a pisos ti bayadan dagiti outsiders idinto a lima a ribo a pisos met kadagiti residente iti Solsona.
Kuna ti bise mayor a bassit ti adda ti reaper na iti ili ti Solsona ken saan da a magabenan iti panagapit isut gapo na nga ipalubos da dagiti taga sabali nga ili tapno makaapit dagitoy.
Inbatad na a daytoy ti rason no apay nga iti napalabas a session da ket inaprubaran da ti sabali manen a pannakaipababa ti bayadan dagiti ag-reaper no sadinno manipud iti 10,000 a pisos ket agbalin a 5,000 pisos para kadagiti outsiders idinto a ti dati a 5,000 a pisos para kadagiti residente ti Solsona ket agbalin a 2,500 a pisos.
Nupay kasta, kunana nga ur-urayen da pay laeng ti panangaprubar ti Sang. Panlalawigan iti nasao nga ordinansa.
Maipalagip nga iti napalabas nga administrasyon a naipasa daytoy no sadinno 20,000 a pisos kadagiti saan a residente ken 10,000 met kadagiti lumugar.
Kunana nga idi nakasubli kas konsehal iti Solsona ket naamendaran daytoy no sadinno 50 a porsiento ti nagbabaan na.
