LAOAG CITY – Atapen ni Vice Mayor Vicentito Lazo ditoy ciudad ti Laoag nga adda ti mangsabsabotahe ti Laoag City General Hospital (LCGH).
Daytoy ket kalpasan nga inbabawi ti Medcore ti katulagan para iti panangipaay da ti libre a dialysis machine iti nasao nga ospital.
Immuna iti daytoy, inlawlawag ni Lazo a nagsurat ti Medcore iti Sang Panlungsod tapno ipakaammo da ti gagem da a mangipaay ti libre a dialysis machine.
Inbaga na a gapu ta nakita da a makatulong daytoy iti ospital ket nagaramid da ti resolusyon a mangipaay ti bileg ken ni Mayor Michael Marcos-Keon a sumrek wenno makipinnirma iti Memorandum of Agreement (MOA) iti Medcore.
Naipalaon ti katulagan a maikkan ti tallo nga dialysis machine ti nasao nga ospital ngem ti paggapwan ti reagents ket iti medcore.
Kabayatanna, bwineltaan ti bise mayor ti maysa a saannan nga innaganan a doctor a mangibagbaga nga adda ti perdi ti makina no sadinno nga inpetteng na nga idi naideliver dagitoy ket nausar pay laeng ken epektibo.
Sinungbatan met ni bise mayor Lazo ti alegasyon a maipagarop a saan a napakaammoan ni Mayor Keon mainaig iti naaramid a MOA.
Inpetteng na nga awan ti kinapudno na daytoy gapu ta kalpasan a mapermaan ti mayor ti maaramid a MOA ket maisubli iti konseho tapno kitaen da no adda dagiti rumbeng a maikkat, mainayun wenno maiplastar babaen iti maysa a resolusyon.
