LAOAG CITY – Naiget nga ipawilen ti Philippine National Police (PNP) ti panangikabil ti visible tattoos kadagiti amin a pulis.
Segun ken ni Philippine National Police – Public Information Office Chief Police Col. Jean Fajardo, naikkat ti moratorium iti nasao a pammilin kalpasan ti naiget a panagrebyu isu a naminsan manen a naituloy ti pannakaipatungpal daytoy.
Nagpalagip ni Fajardo kadagiti aplikante ken sumrek iti Philippine National Police service iti babaen ti recruitment, lateral entry wenno PNPA, naigeten dagiti addaan ti tattoo.
Para kadagiti active police, maikkanda ti tallo a bulan tapno ikkaten dagiti visible tattoos dagitoy no sadino dagiti saan a sumurot iti pagannurutan ket sumango iti kaso administratibo.
Iti agdama, manarimaanen ti panangiprosesoda iti pannakaikkat kadagiti tattoo.
Iti babaen ti Memorandum Circular 2024-023 nga inaprobaran idi Marso 2024, nasken a maikkat dagiti amin a visible tattoos dagiti pulis.
Naammoan a required ti panangaramid ti affidavit ti maysa a pulis nga addaan ti tattoo a saan a visible ken saanen a mapalubusan pay a mangnayon ti tattoo iti aniaman a paset ti bagina visible man wenno mailemmeng iti police uniform.
Kabayatanna, karaman kadagiti tattoo a kasapulan a maikkat ket ti extremist, ethnically wenno religiously discriminatory ken offensive tattoos, indecent, racist ken sexist tattoos ken saan a sakup ti baro a pagalagadan ti aesthetic tattoos kas ti eyebrows, eyeliner ken lip tattoo.
