LAOAG CITY – Nagkedked ni Bise Presidente Sara Duterte a mangsungbat kadagiti saludsod mainaig iti isyu ti confidential fund iti Office of the Vice President.
Segun kenni Duterte, saan nga umno a damagen kenkuana ti nadakamat a pondo gapu ta ti panggep ti hearing ket para iti 2025 budget ti opisinana a dumanon iti P2-billion ken saan a karaman ditoy ti 2025 confidential funds.
Sinungbatan daytoy ni Duterte iti saludsod ni ACT Teachers party-list Rep. France Castro mainaig iti notice of disallowance nga indatag ti Commission on Audit iti nasao a hearing.
Kabayatan ti hearing nga insayangkat ti House Committee on Appropriations, inpakita ti Commission on Audit ti notice of disallowance nga inruarna iti P73 million a balor ti confidential funds a nagastos ti Office of the Vice President idi 2022.
Dinamag ni Castro ken ni Duterte no kasano a naipaulog ti P73 million a balor ti confidential funds a saan a sinungbatan ti bise presidente.
Inawagan ni Duterte a makainsulto a komento ti statement ni Castro, isu a dinamag ni Sara ken ni Marikina Rep. Stella Quimbo a senior vice chairperson ti House budget panel a no mabalin ket mapalubosan met a mangiyebkas kadagiti makainsulto a komento.
Kabayatanna, kinuna ni Quimbo nga awan ti nakitana a makainsulto a komento iti saludsod ni Castro.
