LAOAG CITY – Addan ti naiparuk-at a dua a warrant of arrest kontra kadagiti maitudtudo nga adda ti pannakainaig na iti pannakatambang ti grupo ni Vice Mayor Maja Sales iti Pagudpud, Ilocos Norte idi 2010.
Iti eksklusibo nga interview ti Bombo Radyo Laoag ken ni Vice Mayor Sales, inbatad na a maragsakan gapu ta magun-od da met laengen ti nabayagen a tartarigagayan da nga hustisya.
Maipalagip a dua ti kakadwa ni Sales a natay iti napasamak a panagtambang.
Segun ken ni Sales, dagiti warrant of arrest ket inparuk-at ti Regional Trial Court (RTC) Branch 19 iti ili ti Bangui ken naipalaon ditoy ti kaso a sangsangwen dagiti maseknan a 2 counts ti murder ken 4 counts ti frustrated murder.
Karaman kadagiti akusado ket isuda Rex Benemerito, Rogelio Benemerito Jr. alyas Keneth, Roland Benemerito alyas Puraw, Roldan Curammeng alyas Tottiy, Restituto Jadulcot alyas Ranger, ken ni Julian Manegdeg.
Inpakaammo ni Sales a naikkan metten ti kopya dagiti warrant of arrest ti PNP iti ili ti Pagudpud.
Innayon na nga iti monitor da ket awanen iti ili ti Pagudpud dagiti nasao nga akusado.
