LAOAG CITY – Makipagkita ni Ukrainian President Volodymyr Zelensky ken ni United States President Donald Trump idiay Washington inton Biernes.
Daytoy ket kabayatan iti panangtingiting ni Trump no mangipaay kadagiti armas iti Ukraine a Tomahawk missiles a makabael a mangdadael iti nauneg a paset ti Russia.
Ti nasao a taripnong ket kalpasan nga inrakurak ni Trump a nagbalin a napintas ti progreso ti panagtinnawagda ken ni Russian President Vladimir Putin iti telepono nga agpada nga immannugot para iti face-to-face talks idiay Hungary.
Inbatad ni Trump a maisayangkat ti taripnong iti nagbaetan ti Washington ken Moscow inton sumaruno a lawas.
Mainaig iti daytoy, tinawagan ni Zelensky ti Estados Unidos nga ipaayan ti Ukraine ti advanced missiles nga addaan ti kapaspas a 2,500 kilometers wenno 1,500 miles.
Kabayatanna, inpakaammo ni Olga Stefanishyna, Ambassador ti Ukraine idiay Estados Unidos a sumagmamano nga oras sakbay ti panagtinnawag da Trump ken Putin ket nangiwayat ti Russia ti maysa kadagiti kadakkelan a panangatake ita a tawen idiay Ukraine pakairamanan ti 28 a ballistic missiles ken 320 drones.
