LAOAG CITY – Dumanon iti 12.7 milyon a pisos ti gatad dagiti naipaay a kasapulan dagiti mannalon, mangngalap, livestock raisers ken wine processors iti Provincial Agriculture Office babaen iti Agri Ka Dito Hotline.
Daytoy ket babaen iti panangidaulo ni Gob. Matthew Marcos Manotoc ken inatendaran ti Chairman iti Committee on Agriculture ti Sangguniang Panlalawigan a ni Bokal Jonathan Torralba.
Mainaig iti daytoy, inulit ti gobernador a naiyuswat ti Agri Ka Dito gapu iti naiget a kalikagum ti probinsia a maipaay iti nasapa a gundaway dagiti kasapulan dagiti mannalon.
Inbatadna a para kenkuana ti kapatgan ket iti benneg ti agrikultura para kadagiti mannalon, mangngalap, livestock raisers ken wine processors gapu ta dagitoy ti mangbibiag iti ekonomia ti probinsia.
Malaksid iti daytoy, inlawlawag ni Gob. Manotoc a dagitoy ti rason nga awan ti mabisbisinan a kakailian, adda iti natalged a kasasaad ti probinsia ken nasalun-at dagiti umili.
Gapu iti daytoy, inpanamnamana ti agtultuloy a suporta ti gobierno probinsial ken ti pannakaitandudo ti panagmula kadagiti High Value Crops pakairamanan ti agtultuloy a pannakapasayaat dagiti makinaria ken kagamitan nga usaren dagiti mannalon.
