LAOAG CITY – Ballaigi a naarestar dagiti dua a pump operator ti Diamond Prime Water iti naisayangkat nga anti-illegal drug buy-bust operation iti Bacarra Public Market iti Brgy. 40 Buyon iti ili ti Bacarra.
Nabigbig dagiti subject ti operasion nga isuda Charlie Agaran y Salem, agtawen ti 43, naasawaan ken residente ti Brgy. 40 Buyon iti ili ti Bacarra ken ni Felix dela Cruz y Bumagat, agtawen ti 44, naasawaan ken residente ti Brgy. 33 Cabulalaan iti ili ti Bacarra.
Natiliw dagiti suspek kalpasan a naaktuaran a nagilakoda ti maysa nga heat-sealed transparent plastic sachet a naglaon ti maipagarup a shabu iti maysa a pulis a nagpammaraang kas poseur-buyer.
Nakumpiskar dagiti otoridad kadagiti suspek ti 13 nga heat-sealed transparent plastic sachets a maatap a shabu nga agdagsen ti nasurok-kumurang 4 a gramo nga agbalor ti 27,200 a pisos no sadino maysa kadagitoy ket isu ti maipagarup nga inlakoda iti pulis idinto dagiti 12 ken naala manipod kadagiti suspek.
Malaksid iti daytoy, nakumpiskar pay ti maysa a ribu a pisos a nausar iti buy-bust money, maysa nga sling bag nga agmaris ti brown, maysa a dental floss box, dua nga improvised scoops a naaramid iti drinking straw nga agmaris ti berde, maysa a transparent improvised scoop a naaramid iti drinking straw, maysa a metallic silver Toyota Vios nga addaan ti plate number a ZMD 647, 86 a pedaso ti open transparent plastic sachet, maysa nga empty box of brand RELX Vape, maysa a belt bag nga agmaris ti nangisit, maysa a nangisit a pitaka, 1,600 pesos cash ken maysa a transparent glass tube.
Naammoan a dagiti dua a suspek ket agpada a maibilang nga Street Level Individual.
Mainaig iti daytoy, nagkedked dagiti suspek a mangipaay iti aniaman a komento maipapan iti naisayangkat nga operasion.
Kabayatanna, segun ken ni Ilocos Norte Water District General Manager Mr. John Teodoro nga awan ti ammona iti napasamak kadagiti dua a suspek.
Iti agdama, adda iti kustudiar ti Philippine National Police iti ili ti Bacarra dagiti dua a suspek ken sumango iti kaso gapu iti panaglabsing iti Comprehensive Dangerous Drugs Act of 2002.
