LAOAG CITY – Inpasan ti Kamara iti maikadua a pannakabasa ti House Bill (HB) No. 4058 wenno ti naisingasing a P6.793 trilion national budget para iti 2026.
Naaprubaran ti gakat babaen ti viva voce wenno voice voting iti plenario.
Karaman kadagiti nabaliwan ket ti lungalong a pannakakissay ti pondo ti Opisina ti Bise Presidente inton 2026 iti P902.8 milion.
Inlungalong ni Mamamayang Liberal Rep. De Lima a pagbalinen ti budget ti OVP iti P733-M a kas kapada iti pondo ita a tawen.
Ti addang ni De Lima ket kalpasan ti saan a panagatender ni Bise Presidente Sara Duterte iti deliberasion ti pondo ti opisina na.
Manamnama met ti maikatlo ken maudi a pannakaibasa ti 2026 national budget inton Lunes, Oktubre 13 sakbay ti maysa a bulan a session break-da.
