LAOAG CITY – Inikkat iti serbisyo ti National Police Commission (NAPOLCOM) ti 11 a pulis a maipagarop a karaman kadagiti operasyon kontra droga ken iti kaso dagiti mapukpukaw a mammallot.
Naamoan a dagiti naikkat iti pwesto ket ti sumagmamano nga opisyal ken miembro ti Philippine National Police (PNP) manipod iti Regional Drug Enforcement Unit ti National Capital Region Police Office (NCRPO), karaman ditoy da PLtCol Ryan Jay Orapa, PMaj Mark Phillip Almedilla, PSMS Mark Anthony Manrique, PSSg. Edmon Muñoz, PSSg. Robert Allan Raz Jr.,PSSg. Denar Roda, PCpl. Alric Natividad, PCpl. Reynaldo Seno Jr., PCpl. Ronald John Lanaria, Pat. Rufino Panghulan, ken Pat. Develyn.
Segun iti NAPOLCOM, napaneknekan a guilty dagiti pulis iti dua a bilang ti grave misconduct ken dua a bilang ti misconduct unbecoming of a police officer mainaig iti nagsina a reklamo ti maipagarop a panagkidnap iti babaen dagiti operasyon kontra illegal a droga iti napalabas nga administrasyon.
Basar iti reklamo da Milagros Estacio ken Elizabeth Sotto idi Setyembre 3, 2025, inakusaran da ti sumagmamano a pulis ti panagkidnap kadagiti annak da iti nagsisina nga operasyon idi 2021.
Inbatad ni NAPOLCOM Chair Rafael Vicente Calinisan a ti kidnapping ket maysa a nadagsen a krimen a maibilang a pananggulib iti panagtalek ti publiko ken saan a rumbeng nga i-tolerate.
