LAOAG CITY – Umabot iti 23 a tattao ti natay iti pannakauram ti nagluganan da a bus idiay Bangkok, Thailand.
Karaman kadagiti natay ket ti 20 nga ubbing ken tallo a mangisursuro a dagitoy ket naggapo iti school trip.
Segun ken ni Transport Minister Suriyahe Juangroongruangkit, ti nasao a bus ket patpatarayen ti delikado a compressed natural gas.
Basar kadagiti nakakita iti insidente, naidungpar pay ti bus iti concrete barrier iti highway a masarakan iti northern Bangkok.
Nakaro ti pannakauram ti bus isut gapuna nga ado kadagiti biktima ti saanen a nakaruwar a dagus.
Nakalasat met iti insidente ti 19 nga ubbing ken tallo a mangisursuro no sadinno a 16 kadagitoy ket agpapaimbag paylaeng iti ospital.
Narigatan dagiti otoridad a mangbigbig kadagiti biktima gapu iti nakaro a pannakauram da.
Ti Thailand ket maysa kadagiti addaan ti karisgoan a kalsada iti intero a lubong ken addaan ti saan a natalged a behikulo nga agresresulta ti pannakatay ti 20 ribo a tattao ti kada tawen.
