LAOAG CITY – Natay ti tallo a Red Cross volunteers iti Democratic Republic of Congo gapu iti mapagat-atapan nga Ebola.
Rumrummuar a naala dagitoy ti nasao a virus kabayatan ti panagtrabahoda iti maysa a proyekto iti daya a rehion ti Ituri ken sakbay a naduktalan ti outbreak.
Karaman ti tallo a Red Cross volunteers nga immuna a nagbalin a biktima ti Ebola outbreak iti Democratic Republic of Congo a nagresulta ti sumurok 170 a mapagat-atapan a natay gapu iti virus ken 750 met ti mapagat-atapan a kaso.
Mainaig iti daytoy, inrakurak ti International Federation of Red Cross and Red Crescent Societies (IFRC) a natay ti tallo a Red Cross volunteers kalpasan ti panagserbida iti komunidad nga addaan ti kinatured ken kinatao.
Nagballaag dagiti health experts a dagiti bangkay dagiti pasiente a nakaptan ti Ebola ket posible nga agwaras ti virus gapu iti panagtalinaed nga highly infectious ti bodily fluids kalpasan ti pannakatay.
Maipalagip nga inpangato ti World Health Organization ti public health risk mainaig iti virus iti Democratic Republic of Congo manipud iti “high” a nagbalin a “very high.”
