LAOAG CITY – Mangiwaras ti National Capital Region Police Office (NCRPO) ti 4,402 pulis iti naikeddeng a panaglukat ti School Year 2026-2027.
Inbatad ni National Capital Region Police Office Public Information Office (PIO) Chief ti Police Major Hazel Asilo a mai-deploy dagitoy kadagiti nagduduma a pagadalan iti capital region tapno tumulong iti panagpatalinaed ti kinaurnos ken agbantay iti seguridad.
Kaadoan kadakuada ket agbantay iti ruar kadagiti pagadalan idinto a dagiti dadduma ket agbantay kadagiti Police Assistance Desks ken tumulong pay iti panagtaray ti trapiko.
Basar iti rekord ti National Capital Region Police Office, manamnama manen ti panagdudupudop dagiti nagannak ken dagiti estudiante iti sumagmamano a dadakkel a lugar nga isu ti kangrunaan a banbantayan ti kapulisan.
Karaman ditoy iti Caloocan, Malabon ken Navotas, dagiti lugar a sakupen ti Northern Police District no sadinno a dagiti nasao a lugar ket addaan ti 291 a pagadalan ti kasapulanda a bantayan.
Inpasigurado ti National Capital Region Police Office ti kinasagana daytoy nga ag-deploy ti nayon a miembro ti pulisia no kasapulan.
