LAOAG CITY – Adda ti pakabuklan nga 403 a siudad ken ili a maibilang nga “areas of concern iti intero a pagilian ti banbantayan ti Armed Forces of the Philippines (AFP) pakairamanan dagiti dadduma a law enforcement agencies tapno siguradoen nga agbalin a nakappia ti May 12 midterm elections.
Inbatad ni Col. Francel Margareth Padilla, pannakangiwat ti Armed Forces of the Philippines, adda ti 188 ti adda iti babaen ti category yellow, 177 iti babaen ti category orange ken 38 a lugar ti adda iti babaen ti category red.
Naammoan nga agarup 18 a ribu nga Armed Forces of the Philippines personnel ti mai-deploy para iti election duty ngem kuna ni Padilla a mabalin pay daytoy a manayonan.
Kabayatanna, nakaalerto ti Armed Forces of the Philippines kadagiti nagduduma a security challenges nga adda ti pakainaiganna inton eleksion pakairamanan dagiti pangta manipud iti communist groups, local terrorists, private armed groups, clan feuds (rido) ken dadduma pay nga hostile actors.
