LAOAG CITY – Kinumpirmaran ti Philippine Statistics Authority nga awan ti masarakan na a birth, marriage, wenno death records para kadagiti agnagan “Mary Grace Piattos,” “Kokoy Villamin,” ken “Milky Secuya,” a maipagarop a nakaawat ti confidential funds manipud ti Office of the Vice President.
Iti House Committee on Justice hearing, inbatad ni PSA assistant national statistician Marizza Grande a ti laeng nagan nga “Irene Tan” ti adda ti rekord na ngem daytoy ket naipagagangay a nagan nga addaan ti ado a kapada nga entries iti database.
Dagitoy a nagan ket nagparang kadagiti resibo a naisubmitir iti Commission on Audit a mangsuporta kadagiti gastos ti confidential funds ti OVP idi 2022.
Immunan a kwinestyunaran ti sumagmamano nga agpanpanday linteg dagiti nagan ken nangidiaya pay iti gungona iti siasinno man a makaitudo iti kinasiasino ni “Mary Grace Piattos,” a masuspetsa a saan a pudno a tao gapu ta arigna nagan ti nalatak a restawran ken chichirya.
Kabayatanna, immunan a naipetteng ti kampo ti Bise Presidente ket mabalin nga alias wenno parbo laeng a nagan.
