LAOAG CITY – Umabot iti pito a Palestinians ti natay a pakairaman ti maysa a doktor bayat ti operasyon ti Israeli Forces iti Jenin iti amyanan ti West Bank.
Basar iti report, natay ni Dr. Aseed Jabareen, agtawen ti 50 ken agpapaay iti Jenin Government Hospital kalpasan a napaltugan bayat ti panagturong na iti trabaho.
Naamoan a karaman pay kadagiti pimmusay ket ti menor de edad a lalaki a natamaan met ti bala bayat a nakalugan ti bisikleta.
Inpasingked ti Israeli military nga imbesigaren da a naimbag ti nasao a pasamak.
Maipalagip a kimmaro dagiti mapaspasamak a kinadamsak iti West Bank sipud nangrugi ti gubat iti Gaza Strip iti iraraot ti Hamas iti Southern Israel idi Oktubre 7 iti napalabas a tawen.
