LAOAG CITY – Umabot iti walo a tattao a pakairamanan ti tallo nga ubbing ti natay kalpasan ti panangipabanto ti Russia kadagiti missiles ken drone iti Ukraine.
Inbatad ni Ukrainian President Volodymyr Zelensky nga umabot iti nasurok a 70 a missiles ken agarop 280 a drones ti inpabanto ti Russia iti nagpatnag.
Kuna na a dinosdosena nga ordinaryo a pagtaengan, civilian businesses ken infrastructure facilities ti nadadael iti napasamak a panagatake.
Ti panagatake ti Russia ket napasamak kalpasan ti pannakitaripnong ni Zelensky ken ni US President Donald Trump iti Washington DC ita laeng a lawas.
Iti panagtaripnong da Zelensky ken Trump ket nagutigot ti Amerika nga ikkan ti lisensya ti Ukraine nga agaramid ti Patriot interceptor missiles.
