LAOAG CITY – Nakumpirmaran a pimmusay ti maysa a babai a naulaw bayat nga adda iti merkado publiko ditoy ciudad ti Laoag kalpasan a maipagarop a saan nga inakseptar dagiti dua nga ospital.
Basar iti impormasyon, dagiti ospital a maipagarop a saan a nangawat iti pasyente ket ti Laoag City General Hospital (LCGH) ken Gov. Roque Ablan Senior Memorial Hospital (GRASMH).
Iti panagturong ti Bombo Radyo team iti LGCH, inbatad ni Dra. Mary Ann Yasay Luis, ti chief of clinic a manarimaan ti saggaysa a pannaka-review dagiti amin a pasyente idi Oktubre 12 a daytoy ti petsa nga adda iti blotter ti CSU.
Segun kenni Luis, agpapan ita ket awan pay ti nabirukan da a nagan ti pimmusay a pasyente a naitaray iti nasao a petsa.
Inlawlawag ti doktor a saan da nga agawat kadagiti pasyente nga addaan ti sintomas ti covid-19 ken kunana nga adda dagiti baro a sintomas ti virus kas iti pannakapukaw ti puot, pannaka-atake ken panagpadara no sadinno a ti pasyente ket naawanan ti puot.
Gapo iti daytoy, kunana a nasaysayaat no maitaray laengen iti Mariano Marcos Memorial Hospital and Medical Center iti ciudad ti Batac no kastoy ti mapasaran dagiti pasyente.
Kabayatanna, iti met biang ti GRASMH babaen kenni Dr. Walbert a manarimaan met ti panang-review da iti rekord dagiti amin a pasyente a naitaray idi Oktubre 12.
Nupay kasta, kuna na nga amin a maitaray a pasyente ket akseptaren da.
Naamoan a ti nasao a pasyente ket nagtabonen ita nga aldaw.
