LAOAG CITY – Inbatad ni Police Lt. Col. Rafael Lero, ti chief of police ditoy ciudad ti Laoag nga agtultuloy ti imbestigasyon da mainaig iti maipagarop a pannaka-carnap ti maysa nga HOnda wave 125 nga agmaris ti nalabbaga iti Barangay 2 ditoy ciudad.
Iti inisyal nga imbestigasyon, kuna ni Lero a basar iti imbestigador da ket inbati ti biktima ti motorsiklo na iti ruwar ti gate da nga igid ti kalsada iti oras ti alas-otso ti rabii.
Inbaga pay ni Lero a basar iti imbestigador da ket inbati ti biktima ti tulbek iti mismo a motorsiklo na.
Gapu iti daytoy, kuna ti opisyal a maburburtyaan da no apay a basta lattan inbati ti biktima ti motorsiklo ken tulbek na iti ruwar ti balay da.
Nupay kasta, inbatad na a saanna met a maibaga no inlako wenno insalda ti biktima ti motorsiklo na isut gapuna nga itultuloy da ti agimbestigar tapno maamoan no siasinno ti nangitaray iti daytoy.
Innayon na a karaman nga imbestigaren da ket dagiti CCTV footages nga adda iti lawlaw ti lugar.
Malaksid iti daytoy, saanda met nga iwalin nga imbestigaren ti morality ken character ti biktima.
