LAOAG CITY – Saan pay a nabirukan ti menor de edad a nalmes iti Metro Lapaz ditoy ciudad ti Laoag.
Segun kenni Petty Officer 2 Ericson Tiburcio, ti Deputy ti Philippine Coast Guard ditoy probinsya, agpatpatrolya da pay iti nagbaetan ti Barangay Calayab ken Barangay Gabu.
Inbatad na pay nga inpadas da a mapan iti tengnga ti taaw ngem saan a kabaelan dagiti kagamitan da kas iti aluminum boat.
Kunana a no sumaysayaat to pay ti panawen ket padasen da manen ti tumapog para iti pannakabirok ti ubing.
Inlawlawag na nga idi kalman nagbirok da iti karayan partikular kadagiti mabalin a pakaisuksukan ti ubing ngem napaay dagitoy rason a posible nga adda iti igid ti baybay.
Mainaig iti daytoy, nakikoordenar da metten kadagiti amin a barangay kapitan ditoy ciudad ti Laoag, Paoay, Currimao ken ti sub-station da iti Pasuquin ken Pagudpud.
Inpalgak ni Tiburcio a naireport kadakuada ti napasamak iti agarop alas-kwatro ti malem idi Martes.
