LAOAG CITY – Maisagsaganan ti maipila a kaso a murder kontra kadagiti aguliteg a suspek iti napasamak a pammaltog a nakatayan ti maysa a lalaki iti Pat-patani, Brgy. Bato iti ili ti Badoc.
Daytoy ti inbatad ni Police Major Joseph Tayaban, ti chief of police ti Philippine National Police iti ili ti Badoc.
Segu kenni Tayaban, dagiti aguliteg a suspek ket isuda Ernesto Rosaro aka “Gatto” “erning”, agtawen ti 58, naasawaan ken ni Erwin Rosaro, agtawen ti 39, naasawaan, ken agpada a residente iti Barangay Barbar iti ili ti Pinili idinto a ti biktima ket ni Gilbert Ibea y Torrado, agtawen ti 36, naasawaan, welder.
Inlawlawag na a napan nagala ti “abal-abal” ti biktima kadwa na ti agtawen ti lima nga anak na a lalaki iti paset ti Badoc River.
Naamoan a kabayatan ti panagal-ala dagiti agama ti “abal-abal” ket maipagarop a kellaat lattan a pinaltugan ti suspek ti biktima a nakatamaan ti barukong na a nagresulta ti pannakatay na.
Kunana a kalpasan ti pannakatiliw ti maysa a suspek ket inbatad ti anak ti biktima nga adda pay ti maysa a nangpaltog iti ama na rason a nangiyuswat da ti hot pursuit operation agingga a natiliw ti maysa pay a suspek.
Naamoan a malaksid iti agtawen ti lima nga anak ti biktima ket adda pay ti nakakita kadagiti suspek.
Mainaig iti daytoy, kunana nga iti inisyal ket nakarekobre da ti basyo ti 9MM a paltog iti nakapasamakan ti krimen ngem posible a dua a paltog ti nausar rason a dumalan iti paraffin test dagiti suspek ken dumalan iti otopsiya ti bangkay ti biktima nangruna ket walo ti nakita da nga abot iti bagi na.
Kabayatanna, inbatad na a ti kitkitaen da a motibo iti daytoy ket ti pannakadadael dagiti mula ken pannakatay dagiti taraken malaksid iti dati a susik ti biktima ken dagiti suspek.
Iti agdama, agtultuloy ti naun-uneg nga imbestigasyon dagiti otoridad iti nasao a pammaltog.
