LAOAG CITY – Inpakaammo ni Sangguniang Panlungsod Member Jason Perera a naduktalanna nga awan ti water sprinkler ken fire detection alarm system ti Laoag City General Hospital.
Gapu iti daytoy, agamak no bilang adda dagiti saan a mapakpakadaan a mapasamak a mabalin a mairisgo ti biag dagiti tattao nga adda iti uneg ti ospital.
Kunana a masapol a mailatangan ti pundo daytoy tapno maipasigurado met laeng ti kinatalged dagiti amin nga indibidual nga adda iti maysa a lugar.
Inlawlawagna a posible a mapatawan ti multa ken maipasardeng ti operasion no saanda a sumurot iti naiyetnag a pagannurutan ti lokal a gobierno ditoy siudad ti Laoag.
Inpalgakna a nabayagen daytoy a problema ngem agpapan iti daytoy a gundaway ket arig saan nga agtungtungpal ken sumursurot kadagiti paglintegan.
Mainaig iti daytoy, kuna ni Atty. Perera nga inriingna manen daytoy a banag tapno maipasigurado a natalged met laeng dagiti amin nga umili nga adda iti maysa a pasdek ditoy siudad.
Innayonna a masapol a maiyalokaran ti pundo daytoy iti kabiitan a panawen ken kasapulan ti alisto a tignay babaen ti pannakikoordinar ti Bureau of Fire Protection.
Kabayatanna, naammoan a malaksid iti Laoag City General Hospital ket naammoanna a karaman pay ti Laoag City Hall and Laoag City Public Market and Commercial Complex kadagiti maseknan iti daytoy a banag.
