LAOAG CITY – Naragsak nga inpakammo ni Police Major Joseph Tayaban, ti chief of police ti Philippine National Police iti ili ti Badoc a negatibo ti resulta ti drug test dagiti 624 nga elected ken appointed officials kadagiti barangay iti nasao nga ili.
Segun kenni Tayaban, dagiti dimmalan iti drug test ket dagiti amin a kapitan, kagawad, SK officials, Barangay Secretary ken Treasurer ken dagiti arangay tanod.
Inbatad na a paset pay laeng daytoy iti programa ken kalilkagom ni Police Col. Julius Suriben, Provincial Director iti Ilocos Norte Police Provincial Office, pakaseknan iti panagbalin a drug-free amin a lugar ti probinsya.
Kunana nga ummunan a dimmalan dagiti amin a kameng ti Philippine National Police, simmaruno dagiti empleado iti lokal a gobierno iti nasao nga ili ken sumagmamano a pagadalan ken iti laeng napalabas nga aldaw ket dagiti opisyal ti barangay.
Mainaig iti daytoy, inbatad ni Tayaban nga amin a nakadamat nga elected ken appointed officials ket awan ti nagkedked a dumalan iti nasao a drug testing.
Naamoan nga uray dagiti kameng ti Bureau of Fire Protection (BFP) ket boluntaryo a dimmalan iti drug test.
Kabayatanna, sumaruno a kalikagom da ket ti pannakaideklara ti ili a Badoc ket drug-free municipality ken mangnamnama nga iti kabiitan a panawen ket magun-od da daytoy.
