LAOAG CITY – Ibilang ni Police Major Eduardo Santos, ti chief of police iti ili ti San Nicolas a nasolbaren ti kaso seknan ti pannakabagkong ti maysa a baro iti Barangay 1 iti nasao nga ili.
Daytoy ket kalpasan a nabigbig ken napilaan dan ti kaso a frustrated murder dagiti suspek a taga Barangay Catuguing iti metlaeng nadakamat nga ili.
Segun ken ni Santos, ti laeng pinilaan da ti kaso ket ti mismo a bimmagkong iti biktima ken ti driver ti nagluganan da a pick-up.
Inbatad ni Santos nga adda pay dagiti dadduma a kakadwa dagiti suspek ngem saandan nga inraman pay a pinilaan ti reklamo.
Immuna iti daytoy, napasamak ti pannakabagkong ti biktima a ni Kevin Louise Deuz, agtawen ti 29 ken residente iti Barangay Nangalisan-A ditoy ciudad kabayatan ti kaadda ti grupo da iti maysa a tianggi tapno gumatang ti arak.
Inpakaammo ni Santos nga inpagarop ti suspek a sitsitsitan ti maysa kadagiti kadwa ti biktima rason a napan na kinabil daytoy.
Innayon na nga iti papan koma panaganawa ti biktima ket inpagarop ti suspek a rumesbak rason a binagkong na daytoy.
Iti agdama ket addan iti natalged a kasasaad ti biktima kalpasan a dimmalan ti operasyon iti Mariano Marcos Memorial Hospital and Medical Center iti ciudad ti Batac.
