LAOAG CITY – Nakairekorden ti Department of Health ti 34 a kaso ti heat-related illnesses ditoy pagilian pakairamanan dagiti innem a natay kagiddan ti nangato nga heat index kadagiti sumagmamano a lugar.
Maibasar iti Event-Based Surveillance and Response System, ti nasao a 34 heat-related illness cases ket naipadamag manipod iti Enero 1 agingga Abril 18, 2024 laeng.
Naammoan a dagiti pasiente ket manipod iti Central Visayas, Ilocos Region ken Soccsksargen.
Iti nasao a bilang, innem a tattao ti naipadamag a pimmusay ngem iberberipikar pay laeng ti makaigapu iti pannakatayda.
Nadakamat a ti heat index ket isu ti pagrukudan ti temperatura a marikrikna ti maysa a tao.
Kabayatanna, daytoy ket agsupadi iti aktual a temperatura ti angin no sadino marukrukud daytoy babaen iti humidity ken air temperature.
