LAOAG CITY – Dumanon iti nasursurok ngem 21 a milyon a pisos ti balor dagiti makinaria a pagtalon nga inyawat ti Philippine Center for Postharvest Development and Mechanization iti Ilocos Norte kas paset ti pannakaipatungpal ti Rice Competitiveness Enhancement Fund Mechanization Program.
Karaman ditoy ti walo a four-wheel tractor, 10 a hand tractor, dua a walk-behind transplanter, dua a rice reaper, ken uppat a rice thresher.
Mainaig iti daytoy, inpadanon ni Gob. Matthew Marcos Manotoc ti panagyamanna iti Department of Agriculture ken Philippine Center for Postharvest Development and Mechanization pakairamanan da Congressman Ferdinand Alexander Sandro Marcos ken Congressman Angelo Marcos Barba.
Kunana a dagiti benepisiario ket manipod iti ili ti Pagudpud, Burgos, Pasuquin ken Piddig iti umuna a distrito idinto nga iti maikadua a distrito ket manipod iti ili ti Badoc, Paoay, Currimao, Marcos ken Nueva Era.
Kagiddan daytoy, inbatad ni Gob. Manotoc ti panangnamnamana nga adda manen ti sabali pay a makinaria nga ipaay ti Philippine Center for Postharvest Development and Mechanization para iti probinsia iti masungad a bulan.
Inlawlawagna a kasapulan unay ti makinaria tapno umado ti produksion dagiti mannalon ditoy probinsia.
Kunana a marigatan ti probinsia a gumatang kadagiti dadakkel a makinaria rason a masapol iti pannakibinnulig iti Department of Agriculture ken Philippine Center for Postharvest Development and Mechanization para iti pannakapataud dagitoy a makinaria a kasapulan dagiti mannalon.
Kabayatanna, kuna ni Director Joel Datur ti Philippine Center for Postharvest Development and Mechanization a ti Republic Act No. 11203 wenno ti Rice Tarrification Law ket nangrugi idi tawen 2019 ken agngudo ita a tawen 2024.
Nupay kasta, kunana a manamnama a maiyatiddog pay ti nasao a programa iti tulong dagiti agpanpanday linteg ti pagilian kas kadagiti dua a diputado ti Ilocos Norte.
Inlawlawagna a ti arapaapda para kadagiti mannalon ket mismo a dagiti mannalon ti aglakon ti bagas.
Mainaig iti daytoy, inbatadna a dagiti gunglo dagiti mannalon nga addaan ti bodega ket mabalinda nga ikkan ti production technologies kas iti dryer ken rice mill.
Innayonna a ti panagpaaramid ti bodega ket saan a karaman kadagiti mabalin nga ipaay ti Philippine Center for Postharvest Development and Mechanization kadagiti mannalon nupay mabalin met dagitoy a kiddawen kadagiti agpanpanday linteg wenno saan ket maamendaran ti paglintegan a manginayon iti pannakaipaay ti bodega kadagiti mannalon.
