LAOAG CITY – Ibilang ni Mrs. Twinkle Albano, maysa nga online content creator ditoy Ilocos Norte a simple laeng daytoy a maysa nga ina a napnoan ti adu nga arapaap para kadagiti annakna.
Segun kenkuana, panagkararag ken panagayat ti maysa kadagiti kangrunaan nga isursurona kadagiti uppatna nga annak tapno mapadakkel dagitoy nga adda ti buteng iti Dios.
Inbatadna nga awan ti makaartap ti ayat ti maysa nga ina para kadagiti annakna gapu ta aramidenda amin ti kabaelanna tapno maipaay laeng ti kasapulan dagiti annakda.
Inlawlawagna a naragsak isuna sipod pay idi ubing daytoy iti baet ti kinarigat ti panagbiagda ken dagiti pannubok a naglabasanda nga isu met ti inusarna nga ugali tapno makaiburay ti panagpakatawa kadagiti dadduma.
Kunana a nagbalin a karit iti biagda nga agkakabsat sipod idi naibalud iti amana a nangitunda ti panagmaymaysa ti inana a nangisakad iti panagadalda kadakuada a pito nga agkakabsat.
Gapu iti daytoy, inpalgakna a sinursuroan isuda nga agkakabsat ti inada nga agbirok tapno adda ti taraon nga ipaunegda iti inaldaw-aldaw.
Mainaig iti daytoy, saanna a nailinged a narigatanda daytoy a mangisakad iti pamiliana nangruna iti panagpabasa kadagiti uppat nga annakna gapu ta natay ti asawana gapu iti aksidente.
Kunana a nadagsen nga ibaklay nga agmaymaysa dagiti dakkel a responsibilidad kas maysa a nagannak ngem saanna nga inpalubos a mababay-an ti panagadal dagiti annakna no sadino ket nakaturpos dagiti dua nga annakna iti National Certicate II ti Technical Education and Skills Development Authority, manarimaan met a mangal-ala iti kurso a Nursing ti maysana nga anak idinto nga agturpos ita a tawen iti kurso a Criminology ti maysana pay nga anak.
Pakaseknan iti daytoy, inlawlawag ni Mrs. Twinkle a ti panag-vlog-na ket maysa a wagas tapno malipatanna ti kinaadu ti marikriknana a problema iti biag ken pampaikkat ti stress ken sakit ti nakemna.
Inadmitirna nga isuna ket nangiwat nga ina ket naprangka a tao gapu ta saanna a kayat ti plastic wenno aginkukuna.
Innayonna a nasapa daytoy a nagasawa iti tawenna a 20 isu a kalikagumna a makaturpos amin dagiti annakna gapu ta mamati daytoy a saan pulos a matakaw ti kinasirib iti panagadal.
Naammoan a naam-ammo ni Mrs. Twinkle iti lubong ti online kalpasan a napagsasaritaan ti maysa kadagiti in-upload daytoy a bidyu a dumanonen iti nasurok uppat a milyon a views.
Kabayatanna, babaen iti daytoy, makatulong pay isuna kadagiti marigrigat ken makasapol ti tulong.
Immuna iti daytoy, personal a bimmisita ni Mrs. Twinkle Albano ditoy Bombo Radyo Laoag kas maysa kadagiti kangrunaan a sangaili kagiddan ti pannakaselebrar ti Mother’s Day ita nga aldaw.
